茫然北海道七天遊 ~ 第三天上集

今朝一早起身，就係為咗去函館市場食早餐，因為Jacky食完早餐就即走，所以預鬆啲時間。

同尋日朝一樣，先穿過food court行室內街市，然後到後面街

竟然發現今日休息！尋日我咁晏行過佢都仲開緊！最後唯有接受現實，繼續睇下其他嘢食。

最後決定食海膽鮑魚扇貝蟹腳，雖然海鮮我只係一般，但都覺得好好味

食完之後出到嚟見到蜜瓜好平只係200 Yen，於是又食估唔到咁甜咁多汁，到而家都仲係好掛住，好後悔當時點解唔買多個食

再轉到後面街居然發現另一檔有得釣魷魚！

於是我同伯有都各自釣咗一隻，然後攞嚟整魷魚素麵即係將魷魚切成條狀食，另外再叫多個蟹粥添

我諗住食完走啦，點知Jacky去到室內市場food court又叫刺身飯食，我唯有捨命陪君子食多碗，等今日夜啲去到札幌先再食啦

開心嘅時候過得特別快，又係時候講拜拜，食完之後我哋返酒店，Jacky執埋行李搭火車去登別，而我見仲有時間剩於是繼續睇吓電視，hea到11點先check out，然後去函館站，一次過劃晒指定席嘅飛，去大沼公園同札幌。

去到大沼公園，好在喺火車站已經搵到locker，雖然同outlet一樣都係500円，但居然只接受100円硬幣，好在呢到係火車站，唔使買嘢去窗口唱就搞掂

攞咗公園地圖就開始行，之前睇知道有小火車搭，但因為火車班次問題有成三粒鐘逗留，所以決定都係行

行行下見到老翻似的多啦A夢就知自己無行錯路

終於入到公園，風景其實係幾靚，但見到果一大舊雲，我都唔知算唔算好天......

茫然北海道七天遊 ~ 第二天下集

逛完西波止場超市，由於離食晚餐仲有一段時間，世伯亦行咗唔少路，加上電車一天任搭，於是就決定返酒店唞唞，我返到去當然就係睇電視，居然做緊99台嘅花樣河童。

睇到咁上下，就夠鐘出發，落到去經一輪世伯搵帽事件後就正式出發再搭電車去，但旅行往往都係出乎意料，Jacky一心想食嘅成吉思汗烤肉居然滿座，唯有去隔離食壽司，但等咗半個鐘都位，因為驚纜車關門，最後都係去食拉麵算數。

食飽咗之後就行一段斜路然後就到纜車站。

最初以為無乜人，等等下入閘都幾多人

原來舊年喺六十周年

上到去一睇，同香港嘅近景夜景唔同，遠處一望無際

越睇越凍，原來只得六度

百萬夜景，果然名不虛傳

睇到頂唔順，大家都依依不捨搭返纜車落山，然後返酒店，Jacky一家再喺樓下便利店戰鬥，我就返房抖陣預備下場。

無錯，下場即係宵夜，而家係唔同地方工作，有機會我哋都食下宵夜吹下水，何況在外地。函館嘅選擇唔多，我哋自然到大門橫丁搵嘢食。

行咗幾間，原本想試下燒蠔，可惜老細話夠鐘關門，行過Jacky上次食嘅串燒店仲做生意，於是幫襯。

有趣嘅係串燒套餐係有老細話事，無得揀

可惜無飲之放題

嘢食都唔錯，但唔多夠喉，於是再到龍鳳食拉麵，之前要排長龍先入得去，而家唔使等，但有啲已售罄，連餃子都無

食完之後明點解咁長龍，真係我喺北海道最好食嘅一間，食到飽晒返酒店。