本末倒置

明明係game，張警告貼紙仲大張過咸書……

活化經營？

尋日專登由N轉M返工去評核新人，瞓得五粒鐘就返去真係想死，但此事終於完結，意外係同佢講話OK，佢居然流馬尿，好明顯就係覺得我會針對佢踢佢返去，而家啲新人真係自我到暈，對人唔對事以己度人。

今日原本放假，因為尋人轉咗返M所以今晚補返N，當然係瞓返夠本，瞓醒就幫老媽唱新銀紙。行過呢間嘢見到蛋撻新鮮出爐，橫掂未食早餐於是試下，食完個餐嚟著想叫，聽到隔嚟檯熟客同收銀事頭婆吹水：「咁快無晒蛋撻？頭先仲見成盤！」「都話無喇，成盤係俾人網上訂購咖！」


一間咁舊式嘅茶餐廳有網上訂購蛋撻，唔係呀化？

賴皮

返咗兩晚Project N，今日終於放假。呢排真係忙到嘔，忙嘅唔係工事，係人事。上次先講過我唔鍾意做能力評審，果然真係煩惱繼續來，條友仔果然如之前所料，問六題唔識六題，於是唯有extend佢OJT，點知條友發晦氣遞信，雖然感到意外但心諗都係一件好事。點知鋒迴路轉果邊老細打嚟同我老細say sorry，更勸佢返嚟攞返封信，話今日照返工揾專人教佢。
 

其實佢撈唔撈我真係唔care，但我真係火條友打定信走，做乜仲要我晒三粒鐘心機時間浪費喺佢身上，事後我又要打千字文做record佢點唔掂，自己玩嘢唔好搞到人吖。反而呢幾日啲人係咁問我點，因為條友唱話我哋又唔過料﹑又留難佢同適應唔到呢邊，我只覺得好笑，自己唔掂就好似全世界對你唔住咁，從來唔諗下自己有無問題，咁嘅料就話升職。覺得諷刺之餘亦幾佩服當年自己喺未轉制時果半年依然過到，可能多年來我真的有點睇少自己。

襯住呢兩日放孖day所有嘢都唔理，於是揾返部PSV出嚟玩，居然發現原來而家firmware係3.01但我部機仲係2.05，睇真啲仲發現：原來我一整年都無開過機……對唔著呀PSV……

顧客永遠是對的

 

尋日起身落街食早餐，聽到隔離枱有以下一段對話：

師奶：唔該，我要奶油多多奶，凍奶茶少冰少甜
伙計：凍奶茶少冰唔好飲喎
師奶：天氣凍我驚冰多好凍呀
伙計：咁飲熱喇不如
師奶：我鍾意飲凍奶茶唔鍾意飲熱喎

聽到呢度，我含著啖意粉爭啲噴咗出嚟，突然醒起大飛一句金句：有啲人真係要死唔可以留喺世上........

做好人難，做壞人更難

過咗幾日，病情總算好轉下來，呢兩日雖然返夜，但人反而比起早幾日精神。回想早幾日返日頭，人已經唔舒服，仲要搭著啲新人連基本常識都無，真係想死。究竟係我哋果個年代嘅人懂事，定係而家嘅人太自我中心，以為一句師兄無教就OK？

不幸的是我負責的正是Training，所以其他同事像事不關己的全叫我去評審新人，還附加一句『之前太鬆喇，搞到啲新人以為自己老馮實過到，你要嚴啲揸緊啲呀』，可是當我同啲新人說其不是時，看到他們一臉難為之色，我就覺得點解我要做啲咁嘢，我不嬲都係泥水佬整門，搞掂自己就算，可能對於有權力慾嘅人會係好梳肝嘅事，但我就覺得搞到對方難受，自己又辛苦實在係件苦差，做到自己都有Hard Feeling，有時覺得自己真係唔係做上司材料，想到呢度就好懷念喺東涌時遊雲野鶴的日子。

最近喜愛玩Marvel的轉珠game，都係做英雄好人簡單啲！

Kodak東山再起？

Kodak也推鏡頭相機！Kodak 發表 Smart Lens 相機系列，備有 10x 與 25x 雙版本 

http://chinese.engadget.com/2014/01/09/kodak-pixpro-smart-lens-sl10-sl25/

鬼叫你窮咩頂硬上

放完大假，返咗工一日就打敗仗，每年都係新年前後就感冒，真係準時。其實一病我就即睇醫生，但食晒藥都係咁上下，唯有繼續頂， 卒之頂到尋日，一收工真係立即逃走，返到屋企立即瞓，瞓醒發覺公司留言，原來我頭暈眼花到email都睇漏晒做漏嘢，真係唔好意思。

 

今日襯放假就喺屋企唞下，但都要編排嚟緊工作，今晚同紅磡舊同事聚會打老邊，之後就要返MKK搵料for聽日返工前開會用，放工後又要去LCK偷師人哋change over，真係擔心聽日會累低，想起之前放假因為完成晒手頭上嘅餅而輕鬆，但一返工老細又立即質兩個大餅嚟，可能真係因為真係接受唔到現實咁而病。

上面首歌係肥劉send嚟串我，但我明明都唔窮，點解仲要頂硬上？人生真係無奈，行錯一步真係返唔到轉頭。

2013年我入場看過的電影回顧（不包括Bluray）【下篇】

八月

天台 (The Rooftop)
上映日期 : 08月01日

這戲我其實喺7月18日睇嘅，又係朋友請嘅優先場，坐朋友車先知又一城個停車場要兜咁多個圈。套戲其實好明顯應該做舞台劇比電影好，有啲傷感場面因為太做作變成全場大笑。如果是周杰倫的粉絲應該會睇得好開心，但我此等凡夫俗子只覺他太造作、唱得太多、跳舞唔掂不如真打喇，而且個天台實在抄豬籠城寨抄得過份，比較神來之筆係天台那部留聲機，還有姜大偉臨尾的出現。


九月

推理要在晚餐後 (The After-Dinner Mysteries)
上映日期 : 09月12日

其實我是在8月25日看優先場的，這是Game weekly抽獎的贈券，因為我同阿妹都鍾意睇呢套日劇，所以見有飛送便試下抽。呢套戲同《神探伽俐略》一樣由日劇再搬上銀幕，而且同樣係小說改篇，但最唔同係呢套電影版同電視版風格相當統一，一樣咁漫畫化同搞笑。而Sp版原來正是這電影版前傳，一如其他sp版，男女主角都無乜戲份，男主角係風祭sir，但故事依然ok。不過睇完有兩樣嘢最估唔到：主角居然係李嘉城同原來廣東話係咁搞笑。

Elysium (極樂帝國2154)
上映日期 : 09月26日

其實這戲我喺9月16日睇嘅，又係朋友請嘅優先場，奇怪套戲唔係3D，但又有Dolby Atom，可能因為喺The Grand Cinema睇嘅關係，但我記得睇《悍戰太平洋》時都有3D要戴眼鏡？《D9異形禁區 District 9》導演Neill Blomkamp 尼爾保甘找來的大奸角竟是《D9異形禁區 District 9》的怕事男主角Sharlto Copley 沙杜高柏，此君的演譯完全的判若兩人，實在非常好戲！可惜的是浪費了Matt Damon 麥迪文跟Jodie Foster 茱迪科士打，兩人的角色實在是任何人亦可以演，不過此片以科幻片依然及格，而且更是朋友請的優先場中最好睇的。


十月

Thor: The Dark World (雷神奇俠2：黑暗世界)
上映日期 : 10月31日

又係睇開無得停嘅戲，又係睇開IMAX版返唔到轉頭嘅戲。今集雖然Natalie Portman 妮坦莉寶雯戲份多咗，但最搶都係Tom Hiddleston 湯希度士頓，亦正亦邪亦係最尾估佢唔到，期待佢喺復仇者聯盟2嘅演出。不過全場最搶，一定係Stellan Skarsgård，即係果位時常大膽演出嘅博士…..


十一月

Escape Plan (逃亡大計)
上映日期 : 11月07日

入場原因係舊同事credit card買一送一撩我去睇，但居然去成十年都無去過嘅旺角百老匯戲院睇，感覺又好似無以前咁差。套戲係當年八十年代死對頭合作，亦是唯一賣點，因為故事都幾犯駁，但臨尾個扭橋位都唔錯。兩位老將雄風猶在，但看來Arnold Schwarzenegger 阿諾舒華辛力加比Sylvester Stallone 史泰龍老態啲，起碼史泰龍仲可以隻揪，阿諾只可以擺款用機槍掃，不過一把年紀都仲可以令你看到友情之熱血，仲想點？

宇宙海盜夏羅古 (Space Pirate: Captain Harlock)
上映日期 : 11月28日

又係朋友請嘅優先場，但怪在套戲已經喺11月28日上畫，好少喺上畫後先請免費特別場咁遲，聽朋友話因為有不少人投訴3D效果唔掂，因此發行商專登搞場免費特別場澄請係個別戲院問題，不過對於我最緊要係唔使錢就得喇。本片其實係改篇自松本零­士名作，但其實很多人與他另一名作《宇宙戰艦大和號》混淆了，香港人都係對於佢嘅《銀河鐵路999》、《千年女王》熟悉啲。其實套戲嘅CG製作得相當唔錯，好有質感，但3D感始終唔及真人電影，而劇情都OK，久不久就有場戰爭刺激下你視覺。男主角上夏羅古賊船的伏線編排都幾好，係最後了解事件起因原來所有嘢都係夏羅古搞出來，比較有點多咗舊魚。同埋一早要伏筆男主角係夏羅古接班人，但都唔使要整條疤搞到成個樣都一模一樣呀….


十二月

風暴 (Firestorm)
上映日期 : 12月19日

睇呢套戲係因為聖誕檔期無乜選擇而入場，一早預咗本地3D唔掂而專登睇2D版。結果同預計一樣，連特技都唔多掂，但故事反而有驚喜，尤其伏線呂良偉嘅第二奸角都出現，還有劉德華的人格轉變亦是一絕，可惜是林家棟的故事線落墨不足，如果導演放棄3D特技花招，專心劇情發展，留心鏡頭美術，實有可能成為第二套無間道，當然大前提要整兩個結局滿足中港兩地截然不同的觀眾需要先。

The Secret Life of Walter Mitty (發夢王大歷險)
上映日期 : 12月25日

又係舊同事credit card買一送一撩我去睇，套戲其實係1月3日先睇，但上畫卻係2013年，所以當埋呢一年寫埋。呢套戲其實講嘅係尋夢嘅勇氣，男主角因為不幸的童年而早已放棄夢想接受現實，而他之所以再有尋夢嘅勇氣，正是來自佢嘅白日夢：能與女主角成為一對，所以在攝影師給與男主角尋夢嘅契機後，夢想中的女主角便唱歌鼓勵他（此故事是改篇自舞台劇），結果便開展了尋夢歷險之旅。當然這類故事通常都係頗老生常談，結果當然係要尋找的那一件物事，原來早已在自己身邊，包括了女主角。這套電影宣傳係媲美《阿甘正傳》，當然故事沒有那麼壯大，相反故事是頗溫情小品，但同意將特技融入故事內相當自然如《阿甘正傳》，令人看得舒服。

昨年我只入場看了18場電影，比起第一年做年結的2005年33齣電影少已經係預咗，但奇怪原來昨年大部份都係人哋撩我去睇，與從前多數係我撩人買埋飛入場大不相同，而且咁多年仲有新腳同我一齊入場，都算係咁。

2013年我入場看過的電影回顧（不包括Bluray）【上篇】

不經不覺又2014年了，小弟先祝大家新年快樂！這假期好像放得份外輕鬆，感覺從前寫Blog的興致好像有點回來了，可能由於放假期間一直有『下年 才開工』的想法，而且閒來無事看看自己的舊blog，發覺都有四年無寫自己的入場電影回顧，於是乘著這輕鬆心情，決定為自己2013年做年結，看看自己入場睇咗幾多套戲先。

以下是以上映日期排序，並不代表我的入場時間，因為好多時我看的是優先場，留意。


三月

Parker (轟天復仇),
上映日期 : 03月14日

入場係因為朋友的優先場贈券，套戲真係老土到暈，又係一班賊分贓唔勻，男主角大難不死後復仇，其實呢套戲男主角Jason Statham 積遜史達頓套套戲都係差唔多，十年前睇佢果套《The Transporter 換命快遞》又係咁賣弄個人英雄主義，但又毫不瀟灑，真係唔明點解今時今日佢仲有戲拍，最重要女角係蘿霸Jennifer Lopez 珍妮花露柏絲，真係毫無吸引力，如果唔係朋友請仲有車來回接送真係點都唔會睇呢套戲。對於我唯一吸引力可能係 — 第一次喺新光戲院睇西片。


四月

Oblivion (攻．元2077)
上映日期 : 04月11日

呢套戲喺機場睇IMAX版，效果真係唔錯，一向都覺得靚佬湯做科幻片唔錯，呢套都無令我失望，畫面美術設計相當賞心悅目，故事後段正反完全倒轉，真係估佢唔到。其實到底一個一模一樣﹑一樣記憶嘅人，究竟仲係咪本人呢？

The Hunt (誣網)
上映日期 : 04月11日

這戲我其實是在3月6日晚看的優先場，戲飛其實是老鬼Sam在Game weekly抽獎的贈券，說真的實在估唔到老鬼Sam居然會撩我看劇情片，還要是德文的！我相信連佢自己也估唔到這是甚麼戲吧！這戲男主角是007電影 《Casino Royale 新鐵金剛智破皇家賭場》流血淚的奸角Mads Mikkelsen 麥斯米基辛，他將戲內無辜被鎮內居民排斥欺凌的無奈與憤怒演得相當稱職，當人們寧願選擇相信簡單嘅表面，而唔願意選擇真相，實在是相當恐怖。其實這戲好像 講緊香港現況，希望現在的年青人有機會看看這戲，不要輕易選擇相信那些政棍，變成港產紅衛兵。

毒戰 (Drug War)
上映日期 : 04月18日

好耐未睇過杜琪峰拍《暗戰》式電影，滿懷希冀入場，可惜睇到中段都知唔對路，故事場境全部喺大陸，到結尾雖然如《非常突然》般，但效果實在差天共地。連杜sir都要向大陸市場妥協，實在浪費了一班香港的好演員。

Iron Man 3 (鐵甲奇俠3)
上映日期 : 04月25日

由舊年《The Amazing Spider-Man 蜘蛛俠：驚世現新》開始，老鬼Sam間唔中都會撩我睇戲，呢套我就係同佢睇iSquare嘅IMAX版，不過可能真係對佢嚟講太貴，睇完呢套好似無再睇佢睇過戲……講返套戲，睇咗三集IMAX版，今集都仲係咁正，尤其remote control概念十分新潁，但女主角變成有super power有些突兀，但結局時男主角放棄Ironman如何繼續Avengers 2呢？


六月

Man of Steel (超人：鋼鐵英雄)
上映日期 : 06月27日

事隔七年，超人終於回歸大銀幕，無理由不入場支持吧，看的當然亦是IMAX版。其實2006年版的《Superman Returns 超人-強戰回歸》，Brandon Routh 班頓魯夫的造型已經唯肖唯妙，可惜的是當時導演Bryan Singer 拜仁辛格以致敬心態拍攝，變成只著重重現經典畫面，忽略了故事結構而慘淡收場。近年因為重塑蝙蝠俠的成功，超人亦因此起死回生，重新以寫實的角度看超人在地球如何被受壓力。戲中最感人是養父寧願被龍捲風吞噬，亦不願超人被悉穿身份來救他。可惜超人還是超人，以他的能力很難用一個寫實角度描述，結果後半部同鄉激戰就變成如龍珠般，但比起前作實在是合格有餘。但比較令人失望還是在選角方面，要走寫實路線都無理由搵Henry Cavill 亨利卡菲爾做超人嘛？

神探伽俐略2：真夏方程式 (Midsummer Equation)
上映日期 : 06月29日

今年日劇《神探伽俐略》出續集，為的亦是這電影版續集而出。與第一集時一樣，電影版亦是改篇自同名小說，無獨有偶說的亦是愛，但這愛是親情，與及承傳下一代的愛。福山雅治以一貫方法演譯湯川學當然是手到拿來，可惜的是吉高由里子沒有電視劇般自然，好像有些拘緊，可能由於先拍電影版才拍電視版的關係還未入戲。遺憾今集未能見到內海薰出場，更枉提與湯川學有何發展。

七月

盲探 (Blind Detective)
上映日期 : 07月04日

個人認為，盲探是《神探 Mad Detective》六年後的後繼作。劉德華的莊士敦與劉青雲的陳桂彬一樣，亦是因為身體殘障而退職的警察，兩人亦是不講客觀而憑直覺破案，不過一個是可以『看見』凶案過程及受害人，另一個則可以『看見』人的不同性格。幸好杜琪峯很明顯此作不為大陸市場，亦不為參展攞獎，所以此作沒有牽強結局，亦沒有花巧的視覺畫面，從中亦能像大隻佬帶出放下寓意，令人看得舒服，實在是杜琪峰與韋家輝回勇之作。估不到劉德華和鄭秀文繼《孤男寡女》、《瘦身男女》和《龍鳳鬥》後合作還是非常有合拍，令誇張的劇情也大大提高信服力。

Monsters University (怪獸大學)
上映日期 : 07月11日

怪獸公司十二年後續作，講真隔咗咁多年都唔係好記得劇情，引我入場原因當然係因為Pixar，同埋第一集係試機天碟，而家有埋3D技術同IMAX究竟會靚成掂。唔知係咪睇得太多3D，結果無我預期中咁靚，故事亦是正宗前傳，平舖直述寓意不大，反而正片前嘅遮嘅故事仲吸引我。

Pacific Rim (悍戰太平洋)
上映日期 : 07月18日

這戲是我首次有IMAX版都唔睇，專登到九龍站The Grand Cinema入場試新Dolby Atom，戲飛雖然仲貴過IMAX，但音效與普通Dolby分別不大，但呢套戲由葵涌打到去中環鬧市，明顯係視覺勝過聽覺，散場時非常後悔，決定以後同樣有兩個版本一定會揀IMAX版。這戲可能完了很多人小時候想睇真實版機械人大戰，雖然故事老套但結果好評如潮，加上故事留有伏線，看來續集機會非常大。

 雖然睇戲唔多，但好似都寫得幾長，下集繼續。