啱啱星期二約咗Jacky去睇戲，又俾佢追說好的舊年北京之旅，但我決定都係唔寫著，而係寫呢次睇《鐵甲威龍 Robocop》嘅重拍版。果日其實都幾好彩，約咗Jacky喺九龍塘等時就收到信息話東鐵線又爆鑊，但見九龍塘都無乜特別，於是繼續搭落去旺角東睇戲，去到旺角東遇到舊同事，先知原來粉嶺爆樽，真係遲三個字收工都走唔到。
講返套戲，呢套戲係1987年嘅重拍版，當年都算經典無人唔識，但睇得出其實當年拍時由演員到拍攝手法都唔係A級大片格局，但由於比起《未來戰士 Terminator》半人半機械方式相當有特色，而且諷刺當年完全經濟主義混亂相當出色，所以爆紅就一出三集到玩殘為止。未睇前同事同我講文戲太多比較悶，但我睇後又唔覺，反而覺得相比起舊版有新意，其中尤其以男主角受傷後到變成Robocop過程相當出色，當年只簡單以欺 騙家人男主角死去及將其洗腦輕輕帶過，新版相當著重要家人同意及博士說服男主角接受現實，再接受訓練才回到社會，相當切合現在人權當道的社會環境，再不是 八十年代的有強姦無局賭的狀況。
如果你有留意劇情，其實新版故事都幾刻意與舊版背道而馳，例如舊版的局長係老實好人，而開發的主管只視Robocop係product，今集都剛巧相反。Robocop本身更是刻意有別於舊版，除了大部份時間刻意塗裝成黑色外，沒有三大規條所限及身體動作靈活沒有刻意機械化，舊版是技術所限，全機械的ED209不濟才開發半人半機械的Robocop，今集是一早已有更完美的機械人，但普羅大眾不接受才需要半人半機械。男主角再不是一開始失憶機械化，發夢後才回憶起來回覆人性，而是倒轉一開始沒有失憶，慢慢因為表現被博士削去情感像機械人，最後因為關心兒子才能回復人性。而新版劇情內最具像徵的意義莫過於Robocop的右手，舊版佢係一被兇徒捉住立時射斷已不知所踪，但今集卻刻意於受傷後保留作為人性化嘅像徵。
另一樣驚喜地方就係選角，講嘅並唔係男主角，係飾演博士嘅Gary Oldman 加利奧文，佢將最初只想將研究機械義肢更人性化，到後期勢成騎虎背棄初衷洗掉男主角人性的無奈演得相當出色，相信大部份觀眾都會認同佢實在比男主角更搶戲。講起上嚟加利奧文相當有趣，越老演嘅角色越正氣,，《哈利波特阿茲卡班的逃犯 Harry Potter and the Prisoner of Azkaban》、《蝙蝠俠- 俠影之謎Batman Begins》都係忠嘅，反而又點懷念當年奸得有點傻的奸角如《第五元素 The Fifth Element 》及《迷失太空 Lost in Space 》等。
個人而言，今次版本我是絕對收貨，我想唯一較失色係沒有舊作嘅四眼大奸角般人物，亦沒有那支旗鼓相當的大炮，ED209亦沒有當年強和蠢。當然，如果你對舊版無乜印像，又像蘇sir般問我有無《Pacific Rim 悍戰太平洋》般精彩，我會勸你唔好睇，因為相比下動作場面連三分一都無，會令你覺得貨不對辦，但對我呢位fans，我期待有續集延續這個熟悉但不一樣的故事。
P.S. 睇這套經典重拍，我當然係睇IMAX版，今次還專登去旺角新世紀廣場重開的戲院，由嘉禾轉變成UA，變成有埋IMAX影院當然係正，而且價錢同機場差唔多，最正係好似唔係好多人知重開所以無乜人！
