2014年我入場看過的電影回顧（不包括Bluray）

本來呢篇blog係2015年第一篇，但小弟寫下停下，結果就成為第二篇，嘻嘻。喺度先祝大家新年快樂！今年碰巧又係年尾放大假，但感覺與舊年大不相同，完全無『下年才開工』的想法，可能已經喺度做咗年幾，深明老細係乜人，明白嘢係永遠都唔會做完。

既然放假有時間，於是都整理一下，睇下2014年自己入場睇咗幾多套戲先。以下是以上映日期排序，並不代表我的入場時間，因為有時我看的是優先場。

二月

Robocop (鐵甲威龍)

上映日期 : 02月13日

估唔到事隔廿七年會重拍呢齣戲，當然以今時今日特技相比可謂不能同日而語，尤其博士要男主角看清自己只有頭及肺那幕，當年實在沒可能拍到。可惜今次導演刻意與舊版背道而馳，雖有創意卻沒有了當年的賣點，對社會的諷刺已蕩然無存，只是單純的科幻片，看來續集的機會實在不高。 

四月

Captain America: The Winter Soldier (美國隊長2)

上映日期 : 04月03日

第一集其實我無睇過(雖然我有碟，但而家都未提過⋯⋯)，但其實都無乜影響，因為美國隊長故事實在太耳熟能詳，故事Winter Soldier其實就係第二任美國隊長，唔知到復仇者聯盟2，美國隊長會唔會犧牲？

冰封俠 (Iceman)
上映日期 : 04月24日

一套朋友請睇嘅戲，入場前都不預寄望，但估唔個尾會爛成咁。最離譜係任達華角色，一個古代人點先可能做到副警務處長，現代人都機會不大啦。最尾一啲類似預告嘅鏡頭仲有任達華角色同甄子丹合作尋寶⋯⋯呢套嘢如果真係有續集，我一定請都唔會再睇，正宗虛耗光陰。

五月

2014年05月

The Amazing Spider-Man 2(蜘蛛俠2 : 決戰電魔)
05月01日

又係睇咗第一集唔會唔會睇第二集嘅戲，今集綠魔終於出場，而且同reboot前有所不同。今集特技出色，尤以救女主角慢動作一幕，可惜故事性比reboot前差。如無意外Mary Jane下集應該出場，唔知邊個做呢？

Godzilla(哥斯拉)
05月15日

又一套reboot嘅戲，比起之前版本更加貼近日本版故事，而且造型更似原祖哥斯拉。比起之前綠色蜥蝪版侵略都市，今次哥斯拉如日本版般保護城市，但搞笑臨尾復活，真係幾老土。

永遠的0(The Eternal Zero)
05月15日

朋友請睇嘅優先場，又係大日本主義嘅一套戲，說戰爭的禍害，但明顯避開是誰挑起戰幕，只會令人感覺自作自受，難以同情。另外戲中亦想借戰事突顯現代人身在福中不知福，可惜落墨不多。

Maleficent(黑魔后：沉睡魔咒)
05月29日

睇嘅原因因為女主角實在太神似原著造型，故事以迪士尼嚟講亦是相當破格，一部非常女權至上的電影。與《魔雪奇緣》合併看來，女權至上才是當今迪士尼的皇道，那些童話式的皇子公主式的愛情已不合時宜，由皇子不能吻醒公主已可見一斑。

Edge of Tomorrow(異空戰士)

由日本輕小說改篇的電影，最初引起我興趣係非常相似打機嘅劇情，呢套戲我最喜愛的地方係中間情節亦十分有趣，如《偷天情緣 Groundhog Day》一樣男主角對所有將發生的事情都瞭如指掌，可惜係為了迎合結局有些牽強。結果我買埋漫畫比較，個人都係比較鍾意漫畫版，雖然劇情較黑暗，但較合乎常理及動人啲。

六月

Transformers: Age of Extinction(變形金剛：殲滅世紀)
06月26日
 
睇咗咁多集變形金剛，無理由唔睇埋呢集，睇嘅時候已經無晒期望，因為男女主角已經唔同晒人，唯一亮點喺香港實景拍攝，仲要搞到比人收跎地。結果係無期望自然無乜失望，但新一代狂派變形成細粒方塊狀再變人型，令人感覺哪西求其，起碼以前亂得嚟都覺佢變梗形，而家感覺直情亂嚟。格威龍終於出場，如無意外再有下集應該輪到火棒出場，但我應該唔會再睇，除非柯柏文之死.....

十月

The Giver(未來叛變)
10月16日

睇呢套戲係阿健撩我去睇，相信佢都係被未來呢兩個字所誤導。入場前我已經知呢套戲無乜視覺觀能刺激，但原來我錯了。她的視覺觀能刺激係套片嘅色彩，隨著男主角身份轉變，由刻版的生活變成了解過去人類的歷史活動，由最初的黑白慢慢變成彩色，這拍攝手法的確令我印象難忘。可惜故事實在千瘡百孔，又沒有太多特技附助，結果給人眼高手低的感覺。

十一月

Interstellar(星際啟示錄)
11月06日
 
 導演基斯杜化路蘭繼The Dark Knight Rises之候新作，劇本是由他於弟弟所編，當然唔會差得去邊，但可惜本片雖然無Inception咁深，但很多人都看到一頭霧水，你要香港人先明白相對論才入場，實在有難度。可幸係導演處理男主角的父女情相當出色，令人看得動容，避過了香港人睇唔明就成為爛片的危機，看來自從基斯杜化路蘭拍罷蝙蝠俠系列，已經十分掌握到怎樣平衡藝術與商業的比重。

單身男女2(Don't Go Breaking My Heart 2)
11月13日

上集單身男女，係我認為杜琪峯頭幾位好睇嘅愛情喜劇，所以無乜考慮之下就入場。何惜都係續集效應，無上一集咁好睇，其實故事去到上集已經七七八八，硬要再加插嘅話唯有說女主角再變卦，結果故事線落在古天樂、高圓圓一方，吳彥祖變成客串一般，而且由於故事單薄，唯有再加楊千嬅、周渝民一條線，結果他們論為配角，故事線亦不動人，可以說是狗尾續貂之作。

十二月

Night at the Museum: Secret of the Tomb(翻生侏羅館3：古墓的秘密)
12月18日
 
 入場原因很簡單，只為送別羅賓威廉斯，所以在沒有看觸集之下，便入場睇第三集。如果說單身男女有續集效應，這套戲便是成功繼承第一集嘅精彩熱鬧氣氛，尤其以馬騮同兩個小矮人為甚，導演聰明地將場景轉移到大英博物館，新人物新地方再配原有角色效果不錯，狼人曉治積曼的臨尾客串有驚喜，最重視的是羅賓威廉斯的最後演出不慍不火，恰如其份的完成了他的最後演出。

昨年我只入場看了13場電影，結果今年又比舊年少睇5套戲，由以前要寫三篇，到而家一篇搞掂，希望來年會keep到啦。