獨遊關西五天遊 ~ 第五天

瞓到兩點幾就起身，執埋行李就退房行去搭機場巴士

之前日頭試行過，點知原來夜晚度門無開，結果兜咗成個圈先入到嚟

由於無隔日預售車票，我晨早預鬆時間，所以都可以慢慢坐唞下，到賣飛果陣成班人撲去排隊，我慢慢先排隊尾，除咗我唔信無位之外另外仲有諗法

雖然架車都好爆，但一落車同我預計一樣，我遲上車行李真係擺最開邊，結果成班友等攞行李我已經拉咗喼入去搞掂晒check in

雖然一樣有得入Lounge，都因為六點幾太早無乜人，連做嘢都無乜人

嘢食食晒都無人refill，唯有淨係飲杯嘢睇下雨景

無耐就上機，又係特快隊唔使排，一上機我就好有興趣睇餐牌

原本想食點心，可惜無晒唯有食蛋餅。好奇怪我兩程機都無影飛機餐，因為我掛著睇戲唔記得影，嚟果陣就掛著睇《縮水人間 Downsizing》，走就掛著睇《正義聯盟 Justice League》

落機又係特快隊，行李亦係優先，結果就好快完咗呢個旅程

其中有個有趣嘅小插曲係我入咗境開手機，居然發現有幾十條whatsapp未閱，而且過e道時更有人打whatsapp call俾我問我有無事：原來起飛之後一粒鐘即係八點，當我喺飛機半空中時，大阪居然發生6.1級地震！連老細都whatsapp問我有無事，我覆到搭緊荃灣綫都眾有人問緊，真係有驚無險！

大阪地震：凌晨餘震不斷　再添1亡魂至5死

獨遊關西五天遊 ~ 第四天下集

返到神戶唞下，食返個期間限定麥旋風

無嘢做四圍逛，幫老鬼搵下足球書，可惜佢無乜運，無發現

反而我阿妹就好彩，喺藥粧被我溫到佢要嘅洗頭水補充裝

之後仲要發現神戶原來有DHC，幫佢買兩支防曬仲要有獎抽，抽到discount

行到咁上下就去食飯，一支公當然搵返上次間平嘢ステーキランド神戸三ノ宮店食

時間尚早兼一支公，連隊都唔使排就直入有得坐

飲個湯先

牛柳到咗

但廚師睇嚟好忙

終於得閒隊俾我過目

開波

頭盤真係越食越餓

真係睇表演咁

真係好正呀

搞掂，我開動啦

食完飲返杯凍咖啡，大滿足

返難波途經梅田，順便搵埋介紹既日本版美津路，點知又摸門釘，唉

返到難波行Bic Cam，見到日本啲玩具鐵路都咁大堆頭，其實真係買返公司當交功課

由於要搭早機，夜晚食埋人頭酒店碗拉麵宵夜就預備瞓，世界盃都睇唔晒

總計全日都係用得二百零MB，即係每次旅行大使果個根本唔係我

獨遊關西五天遊 ~ 第四天上集

今日起身就落樓下食早餐，人頭酒店當然係包埋，同早兩日京都唔同嘅係佢有西式嘢食，可惜聽朝我搭早機嘥咗聽朝無得食，所以今朝要食返夠本

食完就出發去寶塚，當然係去睇手塚治蟲博物館

隔咗五年，好在仲記得點行嚟

入到去都係無乜點變

但再行入啲，居然而家多咗套戲睇，唔使錢當然入去睇

原本套片同宮崎駿博物館好唔同，講嘅其實係手塚治蟲嘅人生，當然係無字幕我自己估啦

睇完出嚟上樓上發覺唔對路，點解咁多𡃁妹嘅

憑我幾廿歲人仲睇Think Big天地，我終於醒起呢套嘢香港都有播過，叫《偶像學園》

但我阿妹之前明明同我講話crossover嘅係《超時空要塞》，所以我先再嚟睇，算啦，繼續行落地牢果層啦

落到嚟我終於發現，原來月尾先係，頂

當然，今次我都係無上堂，因為聽唔明

帶著落寞嘅心情返番車站，出發去垂水

搭搭車發現對面阿叔除咗一隻鞋自斟自飲，自得其樂，突然諗起呢首歌：

有陣我斟杯啤酒 聽下唱機舒散我悶氣

自由地攤系梳化 雙腳翹起我慢慢回味

去到垂水，個肚話俾我知係時候食晏，於是決定喺附近搵下有乜好食

行咗兩個街口，見呢間麺や 六三六好似幾掂，決定試下

我諗我對期間限定呢四個字係無抵抗能力，於是喺自動售票機選擇咗呢個期間限定濃厚豬骨

坐低吧台前環境都唔錯

個麵嚟咗，味道唔錯，但湯底濃到似沾麵，無錯豬骨味勁濃，好在要普通辣，如果唔係死梗

醫飽肚之後就行去海邊，去我嘅目的地三井神戸outlet

舊地重遊嘅主要原因係嚟咗關西咁多次，呢度係我買最多嘢果次

今次發覺呢度似兒童樂園多過似outlet，但天氣真係唔錯

結果我都只係買到對鞋

逛完之後返車站等車，突然發現全車站得我一個，於是影咗張全景相