特別聖誕

今晚係平安夜，先同大家講聲Merry Christmas❣ 其實今日不單係平安夜，同時亦係我九天連續假期的第一天，無記錯係我入行以嚟第一次，不單可以喺聖誕放大假，而且仲一直放到過埋元誕，連跨三個紅日，再加上我手頭上跟開啲大餅，喺放假前都搞掂晒，所以呢個假期放得份外輕鬆難忘。

因為今年聖誕假期咁特別，我就想知自己早兩年聖誕點過呢，可惜先發現原來呢兩年聖誕我都無寫blog，所以我就check下facebook，發現應該都係喺工作之中渡過，尤其喺MKK 25/12一定要帶聖誕老人無得放，最近果次聖誕假期應該都係啱啱前年升職去粉嶺嘅時候，都只係放26號一日，好似今年咁喺聖誕放長假應該都係生平首次，仲要係今年做reliever無roster pattern嘅時候，真係發夢都估唔到。

暫時都未諗到呢個假期做乜，不過應該都係追返之前時間，可以輕輕鬆鬆打機或者睇碟先，喺咁悠閒嘅心情底下，原本今日想買份聖誕禮物慰勞下整年繁忙的自己，原本錢都㩒埋諗著買嘢，行行下街諗到工作嘅嘢可以留返下年先算，已經係今年一份最好嘅禮物，想到這裡便笑笑聳聳肩，原銀不動悠閒地慢慢行回家去。