風暴 Firestorm

難得放長假，當然搵返套戲睇，但今年聖誕檔期真係唔多掂，唔好話搵套大片，連令我有意欲入場想睇嘅戲都無，回想當年放長假，我真係可以入場入足五日，除了當年我大把老友陪，都要真係有五套吸引我嘅戲先（我的電影黃金週總結 ），而家除咗我之外，電影業都真係今非昔比。結果喺無乜選擇下，尋晚我選咗劉華嘅《風暴》睇。

 呢套《風暴》係講警隊精英呂明哲 (劉德華 飾) 為逮捕犯罪團夥頭目曹楠 (胡軍 飾) 處心積慮且不擇手段，幾欲到手之際竟被兒時好友、慣犯陶成邦 (林家棟 飾) 攪局。陶為贏回對其品行徹底失望的女友燕冰 (姚晨 飾)，求呂為其過往捏造臥底身份，並助其破案，最後甚至不惜出賣同夥。風暴過後，二人卻驚覺更陷渾沌……。選呢套戲入場原因當然唔係因為故事啦，而係聽朋友講無乜冷場由頭打到尾，睇後亦是如此，明顯本片犯了近年港產片『動作凌駕劇情』嘅通病，但事實今時今日港產片看來亦是只剩下動作片一途，奈何。

話雖如此，其實呢套戲劇情亦給我驚喜，尤其係明知劉德華係老板，佢一定賣力及角色實係如超人般不死係預咗，但去到後期佢角色居然如《殺破狼》般為令胡軍入罪用了非常手段，繼而再被梁烈唯角色令他越陷越深，這一轉變實在精彩。另一方面林家棟為了挽回女友，而為劉華做臥底，結果劉華不是為破案卻是為滅口，沒有人知道林家棟是臥底，這條線頗有《無間道》味道，可惜導演沒有深化劇情只著墨於鎗戰特技，實在是捉到鹿唔識脫角！

至於宣傳一直強調的特技真係算把喇，看到地陷啲車跌落中環站月台對開路軌上，列車明明正駛入月台，理應剷出地面或剷進月台，結果畫面上列車仿如消失了，連最後的俯視鏡亦望不到，我真的笑了出來，好在一早跟同行朋友說了港產片唔好睇3D，如果唔係我應該笑唔出。故事結尾當然唔使講，無理由放棄大陸市場，結局當然如此，但這亦是令我諗起《無間道》的原因，當年香港跟大陸版是兩個不同的結局，既然故事場景發生在香港，為什麼結局不分為兩個版本，令大家看得舒舒服服呢？

 

這戲睇完後給我感覺如《毒戰》一樣，無論開始，發展幾港產片好，結尾還是會變成大陸片，看來現在港產片除了三級片外，只有彭浩翔的作品才是真真正正港產片（如果無太多粗口嘅話）。