突如其來的暑期工

開心嘅時間過得特別快果然無錯，呢個六月真係話咁快就過，首先頭三個星期又落咗去大埔，雖然見唔到老細已經輕鬆好多，但間唔中都有電話到走唔甩，但呢個星期真係正到無朋友，完全脫離公司去咗另一間公司，輕輕鬆鬆去返工。

真係估唔到幾廿年後都仲有機會打暑期工，其實應該話比打暑期工仲輕鬆，因為其實都唔會要我哋真係落手落腳去做，反而佢要安排人手去講解我哋聽，而且仲成日請食飯或下午茶，真係唔係幾好意思。

另一樣感受頗深就係以為自己份工都頗大壓力，但見到人哋日日爆鑊咁樣真係覺得小巫見大巫，而且人哋部門分工真係好細緻，原來自己係個大打雜，當然呢樣有好有唔好，但亦令我大開眼界。

但假期總會結束，我都係要回到現實，聽日就要返回崗位，唉。