走過烽火大地

今日下晝兩點幾起身瞓醒，食埋嘢me me麼麼到五點幾先睇到手機有個miss call，聽番留言先知原來今日隻Edge of Tomorrow到咗，因為香港唱片九龍塘分店已經執咗，所以今次我係喺金鐘分店訂，訂嘅時候仲未發生佔中，所以今日聽完留言之後都有D擔心，但錢已經俾咗冇理由唔去攞返隻碟，於是就踏上旅程。

去到先發現金鐘原來原來路面人唔太多，於是好順利攞完隻碟之後就行返港鐵站，落到去先明白科幻小說裏邊成日話未來的人係會搬晒落去地底住原來係真嘅，港鐵站裏面人頭湧湧到處都係人，用咗成五分鐘先落到月台，當然上車又係另一番鬥爭。

返到旺角之後彌敦道當然係繼續封咗，但反而方便我可以直接返屋企，但搭車時睇手機知道的變種特攻:未來同盟戰都出咗不特止，原來屋企對面有大眾書局，於是順道去買埋先返屋企，滿載而歸。