無情情台北三天遊 ~ 第一天上集

真係好耐無寫過blog，原因都係日忙夜忙唔知忙乜，諗返以前做細嘅返13個唔同嘅更反而有時間心情寫blog，而家只係返3更都無哂時間心情，真係唔知點解。

呢兩星期係喺紅磡之後第一次可以放連續兩星期假，原因係同事要我五月果個星期假，所以佢先俾三月呢個星期假我。所以連續放兩星期假真係冇理由喺香港戇居居，於是就上網睇又比我見到一個奇怪嘅plan：由台北出發經香港來回大阪TWD14,008（約HK$3,746）起。呢套飛合共有4程商務機票（台北-香港、香港-日本、日本-香港、香港-台北），真係勁平，而且我又未坐過商務，計過六月應該都放到假，所以就扑鎚。

由於第一段台北-香港係一定要飛，否則之後嘅機票都會被取消。所以喺上星期我就決定出發去台北，但由於應承咗同事食公司春茗，又要避連續紅日貴，所以只係短短哋去三日。我只係買咗另一張香港去台北嘅機票就出發，正常應該買來回包住呢套飛，玩2次台北+1次日本，但我四五月要頂返同事假，到六月只可以去日本，套飛又要三個月內玩哂，所以第二次台灣實在無時間去，第四程唯有豪俾佢，但係計三程都有著數。唔知係咪興奮一陣，瞓到五點幾就醒咗，唯有六點幾落街食早餐，到七點幾就攞埋個喼去機場，攞埋wifi蛋八點幾就上機，九點幾就飛十一點幾就到台北，全程無停過時間啱啱好。

過完關攞返行李出到嚟都12點幾，去到桃園機場捷運站買咗套遊客飛，包括來回機場兩程嘅八達通同埋48小時任用嘅八達通，就搭車去台北酒店擺低行李先。



好在而家有google map，喺台北車站好順利就搵到我住嘅台北門酒店，Counter個女仔論論盡盡以為我過咗期入住，查實係佢睇錯左book房嘅日子以為係入住日子，搞咗一輪清楚之後就好順利check-in咗然後再擺低個喼，跟著孭著背囊再出發。



望一望錶都成一點鐘，六點幾食過早餐後淨係喺飛機咬咗個包，然後就無食嘢所以有啲肚餓，whatsapp問過原著民阿健無乜推介，就是是但但搵咗間牛肉麵食，叫咗個最貴嘅牛三寶，嚟到先知原來係牛肚，牛腩同牛根，好在都好好味。





然後就搭捷運去淡水，喺天元宮賞櫻期間限定巴士直入裡面落客，非常方便。

十幾分鐘車程之後就到，估唔到閒日兼花期尾都幾多人，好似我呢班車就全車滿座。



原本都預咗花期尾無乜花睇，點知個別有幾棵櫻花都開得相當燦爛，不枉此行。

又寫得差不多，下篇繼續希望唔好爛尾啦。