茫然北海道七天遊 ~ 第一天

變幻原是永恆呢句真係金句，喺半年前諗都冇諗過香港會搞成而家咁。其實今次去北海道已經係我今年第三次去旅行，做咗嘢十幾年都未試過一年去三次旅行，但依家咁嘅時勢真係唔去唔掂，其實講真今次原本都冇預計會去，只係幾個月前知道Jacky佢哋會去，直到上個月突然港航推出一半積分優惠換機票，咁啱我啲分啱啱可以換一程來回商務北海道機位，又咁啱Jacky去嘅時間係我sp week，結果都唔使點諗就book晒酒店機票，決定出發去第一次嘅七天遊。

但事實人算不如天算，臨出發前幾日，突然收到消息，由讀書識到而家，識咗幾十年老朋友過身，真係一下子好難接受，尤其佢自己都係做醫護行業。而最令我覺得遺憾係佢出殯當晚，就係我出發當日，酒店機票已經改唔到，唔可以送佢最後一程的確令我非常難過，亦令我整個旅程都提不起勁，不願意四處遊覽，好在中間有幾日join埋Jacky，跟著佢四處去先可稍稍驅去愁雲。

由於而家逢星期六日梗有公眾活動，我搭星期一朝早八點機，都已經做定準備零晨四點幾出門搭N巴士，但等咗半粒鐘都無巴士，見等緊有啲著巴士制服嘅人開始離開，話有啲路block咗嚟唔到，正心想而家搭去九龍站又未開，結果等咗半粒鐘有架NA20到，成四條嘢都照上，費時夜長夢多。

順利到達機場，但一落車就要排隊安檢，結果又排咗幾個字先入得去，好在入到去香港航空櫃位都無乜人，好快我就搞掂check in，但已經係早上六點。正常我應該過關然後入禁區lounge食嘢，但因為我買咗JR Pass要喺機場攞，間嘢要七點先開，結果我都係頂唔順肚餓，去老麥買早餐醫肚。

好彩等到六點十間嘢就開，喳喳臨換埋張單就趕入禁區，七點二就搞掂，見仲有時間，決定入lounge食埋嘢先上機。其實我幾鍾意港航嘅lounge，早餐都唔馬虎，除咗有自助嘢食之外，仲有普通早餐嘅通粉米粉，到我攞果陣先發現可以配埋雙蛋或炒蛋，但當時已經係七點七已經無時間，所以我即刻趕去閘口，未埋到去職員已經搶咗我張機票過機，到我入閘登機依稀聽佢話仲爭兩個。

遲到果然係有報應，同上次去東京坐商務一樣，我個窗口位又俾人霸咗，仲離譜到連人都唔見埋，個空中小姐同我講話唯有等佢返嚟先同佢再傾，於是我就索性去廁所鬆鬆，返番埋個位嗰陣嗰位大媽已經返返佢自己搵個位，總算解決。

由於喺lounge都已經食到飽，飛機上嘅早餐我覺得無乜吸引力，反而因為預咗去北海道要坐四、五個鐘頭飛機，睇戲對於我仲有吸引力，結果落機前我睇咗兩套，分別係《我的超豪男友 Crazy Rich Asians》同《翻身動物園 We bought a zoo》，基本上我心情同戲中麥迪文差唔多，朋友的離去對於我去了異地沒多大分別，情緒依然開懷不了，反而我有點佩服佢還有心情同施嘉莉祖安遜打車輪並約定日期再開波。

當地時間一點幾終於到北海道，搞掂完過關就去機場JR站換JR pass，位姐姐好有耐性同我講等半粒鐘有車去函館，我話想去機場附近outlet先，佢話咁就10分鐘後有車，於是出埋指定席飛即刻落月台預備上車。

搭一個站就落車，由於我見成車爆滿，於是一落車就整張去函館四點幾指定席嘅飛，然後先去outlet。出咗站再行5分鐘就到outlet，由於我仲係拖著個喼，於是搵locker寄存，果下先發現無散銀，結果轉登食杯雪糕唱散銀，其實果陣得十零度，我自己都專登攞返件外套出嚟著，全場得我一個食雪糕。



行咗個幾鐘，其實我無乜心機睇嘢，只係發現好多情侶同一家大細行，原來之後Jacky話我知星期一係公眾假期，唔怪得之咁多人。發現完日本原來都有翠華之後，諗著是但買件衫就走，因為我只帶咗兩件衫嚟，結果俾錢發現條龍好長，而班車又就到，miss咗要等多成個鐘頭，終於都係決定唔買走人，準時返到車站上車繼續去函館。

其實我零晨三點幾起身，搭飛機無瞓過到下午四點幾，呢班車正好可以補眠，但我瞓咗兩個鐘頭就醒咗，跟著坐多成粒鐘，到夜晚七點幾先到函館站。

今次間酒店唔係我揀，係諗著同Jacky住埋同一間方便跟佢book，但估唔到就喺車站斜對面咁近，一過馬路就到，更估唔到check in果陣個姐姐同我講廣東話，佢話佢都係香港人派咗過嚟做，我心諗你執到啦，俾我呢段時候都唔想喺香港，點知佢係咁撩我入會同upgrade早餐，我耍完佢之後喳喳臨返上房。

喺房唞咗陣，就落街去附近大門橫丁一間好細好殘舊嘅麵舖食拉麵，手加口之下叫咗碗辣嘅味噲拉麵，由於一心想食碗豉油或鹽味拉麵，臨返酒店前去便利店買咗碗豉油杯麵同草莓牛奶返酒店做宵夜，諗著瞓晏啲等聽日Jacky到。